Загрузка ...Дзяніс Трафімчык – аўтар папулярнага аграблогу: «Узнагарода ад Прэзідэнта Беларусі натхняе на новыя здзяйсненні»
На абласных “Дажынках-2024” праходзіць цырымонія ўшанавання перадавікоў сёлетняга жніва, выдатных работнікаў сельскагаспадарчай сферы і тых, хто зрабіў вялікі ўклад у развіццё галіны.
Падзячным лістом Прэзідэнта Рэспублікі Беларусь быў адзначаны наш зямляк, інжынер ААТ “Граніт-Агра”, вядомы на ўсю Беларусь аграблогер з аграгарадка Круцілавічы Дзяніс Трафімчык. Ён падзяліўся сваімі ўражаннямі ад сустрэчы с кіраўніком дзяржавы і свята хлебаробаў:
– Упершыню на цырымоніі ўзнагароджання на галоўнай сцэне “Дажынак” у Мастах мяне прадставілі не проста як інжынера, а аграблогера. Аграблог – гэта справа пяці гадоў майго жыцця, у якую за гэты час укладзена шмат працы, жадання, сіл і ідэй. Усё гэта апраўдалася. Сёння аграблог сапраўды народна любімы, праект атрымаў шырокую вядомасць па ўсёй Беларусі найперш дзякуючы яго героям – простым, працавітым, добрым, таленавітым і цікавым асобам – нашым працаўнікам вёскі.
Узнагарода ад Прэзідэнта Беларусі, якую атрымаў сёння, адчуваецца нечым грандыёзным і неверагодным, натхняе на новыя здзяйсненні. Мае старанні заўважаны на дзяржаўным узроўні, гэта вельмі прыемна і адказна. Для мяне такая высокая ўзнагарода – паказчык таго, што я раблю правільную і патрэбную людзям справу. Ёсць куды расці і да чаго імкнуцца. Дзякую усім, хто паверыў у аграблог і прадаўжае гэта рабіць.
